Жастар – қоғамның ең белсенді әрі жаңашыл бөлігінің бірі. Бүгінде жас буын жаңа идеялар ұсынып, тың бастамаларды жүзеге асырып, қоғамдық өмірге белсенді араласу арқылы елдің дамуына өз үлесін қосып келеді. Дегенмен азаматтық белсенділік тек ауқымды жобалар мен үлкен бастамалардан тұрмайды. Ол ең алдымен күнделікті өмірдегі қарапайым әрекеттерден, жеке жауапкершіліктен және айналада болып жатқан жағдайларға бейжай қарамаудан басталады.
Осы бағытта Біржан сал ауданының Жастар ресурстық орталығы ұйымдастырған «Жастар және қоғам: жауапкершілік пен бастама» тақырыбында жастармен кездесу өткізілді.
Кездесудің негізгі мақсаты – жастарға дайын ақпарат ұсыну ғана емес, олардың өз ойларын еркін білдіруіне, пікір алмасуына және қоғамдағы өз рөлін түсінуіне мүмкіндік беру болды. Кездесу барысында жауапкершілік ұғымы, өз шешімдері мен әрекеттерінің салдарын түсіну, жеке ұстаным қалыптастыру және қоғамдық бастамаларға белсенді қатысу мәселелері талқыланды.
Іс-шара еркін пікір алмасу форматында өтті. Жастарға күнделікті өмірде кездесетін түрлі жағдайлар ұсынылып, олар өз көзқарастарын білдіріп, шешім қабылдау жолдарын талқылады. Қатысушылар өзара пікір алмасып, кейбір мәселелер бойынша түрлі көзқарастарын ортаға салды. Мұндай формат жастарға дайын жауапты жаттап алудан гөрі, өз ойларын қалыптастырып, әрбір шешімнің жауапкершілігін түсінуге мүмкіндік береді.
Кездесу барысында жастардың бастамашылдығына да ерекше көңіл бөлінді. Қазіргі таңда жастардың қоғамдық өмірге араласуына көптеген мүмкіндіктер бар. Волонтерлік қызмет, әлеуметтік және экологиялық жобалар, мәдени және спорттық іс-шаралар, жастарға арналған түрлі бағдарламалар – өз қабілетін көрсетуге және қоғамға пайдалы іс жасауға мүмкіндік беретін бағыттардың бір бөлігі.
Ең бастысы – қандай да бір мәселені көрген кезде «Мұны біреу жасап қояды» деп күтпей, «Мен не істей аламын?» деген сұрақ қоя білу.
Қоғамдық жауапкершілік әрдайым үлкен іс жасауды талап етпейді. Қоршаған ортаны таза ұстау, қоғамдық тәртіпті сақтау, мұқтаж адамға қолдау көрсету, пайдалы бастамаға атсалысу немесе айналада болып жатқан мәселеге бейжай қарамау – мұның барлығы азаматтық жауапкершіліктің көрінісі.
Осындай кездесулер жастардың пікірін ашық айтуына, өз ойын еркін жеткізуіне және қоғамдық өмірге белсенді араласуына ықпал етеді. Сонымен қатар жастармен жұмыс істейтін мамандар үшін олардың ой-пікірін тыңдап, ұсыныстары мен қызығушылықтарын білуге мүмкіндік береді.
Бүгінгі қоғамға тек бақылаушы емес, өз ортасына пайдасын тигізуге ұмтылатын, бастама көтеріп, жауапкершілік ала алатын жастар қажет. Әрбір жақсы іс үлкен өзгерістің бастауы болуы мүмкін.
Жастар – қоғамның болашағы ғана емес, оның бүгінгі белсенді бөлігі. Ал өзгеріс «Мен бастаймын» деген қарапайым шешімнен басталады.
Оралбек Әйгерім,
Жастар ресурстық орталығының психологі.
