Ақмола облысының Зеренді ауылында тұратын азамат Wildberries маркетплейсі арқылы автомобильге арналған керек-жарақты сатып алу кезінде қиындыққа тап болды. Ол Haval маркалы автокөлікке арналған төбеге орнатылатын жүк салғышқа тапсырыс берген, алайда жеткізілген тауар сипаттамада көрсетілген талаптарға сәйкес келмеген.
Тапсырыс қаңтар айының соңында жеткізілген. Орнату барысында жүк салғыштың бекіткіштері басқа болып шыққаны және көрсетілген автокөлік үлгісіне сәйкес келмейтіні анықталған. Осыған байланысты тауарды пайдалану мүмкін болмаған. Сатып алынған тауардың құны 35 300 теңгені құрады.
Мәселені өз бетінше шешу мүмкін болмаған соң, тұтынушы Ақмола облысы бойынша Сауда және тұтынушылардың құқықтарын қорғау департаментіне жүгінген. Департамент мамандары тарапынан құқықтық және консультациялық көмек көрсетіліп, тұтынушыға талап арызды сауатты рәсімдеуге, тауардың сәйкессіздігін тіркеуге, сондай-ақ сатушы мен маркетплейстің қолдау қызметіне өтініш жолдауға жәрдем көрсетілді.
Сонымен қатар, тұтынушылардың құқықтарын қорғау саласындағы заңнама аясында әрі қарай әрекет ету бойынша қажетті түсіндірмелер мен ұсынымдар берілді.
Өтінішті қарау нәтижесінде тұтынушының талаптары толық көлемде қанағаттандырылды: тауар кері қайтарылып, төленген ақшалай қаражат толық қайтарылды.
Аталған жағдай тұтынушылардың тапсырысқа немесе сипаттамаға сәйкес келмейтін тауарды қайтаруға құқығы бар екенін және құқықтық кеңес пен уақтылы қолдауға жүгіну өз заңды мүдделерін тиімді қорғауға мүмкіндік беретінін көрсетеді.
