Қосшы қаласында республикалық «Таза Қазақстан» бастамасы аясында ауқымды экоплоггинг өтті. Шараға мыңнан астам қала тұрғыны қатысып, қала өзінің бес жылдық мерейтойын атап өтетін жылы көктемгі абаттандыру маусымының негізгі оқиғаларының біріне айналды.
Іс-шара барысында белсенді топтар бекітілген аумақтарды тазалап, физикалық белсенділікті экологиялық волонтерлікпен ұштастырды. Кампания басталғалы бері Қосшыда едәуір жұмыс атқарылды: су айдындарының маңы тазартылып, ағаштар әктеліп, балалар алаңдары абаттандырылды.
Ақмола облысы әкімінің орынбасары Досұлан Айтбаев акцияның тәрбиелік маңызын атап өтті:
«Құрметті жас қаламыздың тұрғындары мен қонақтары, белсенді жастар! Бүгін біз «Жаңа қала – Таза қала» атты ауқымды экологиялық акция аясында бір арнаға тоғыстық. Бұл шараға тек қала тұрғындары ғана емес, облыстың түкпір-түкпірінен келген белсенділер де қатысуда. Осындай игі бастамаларды қолдау – Мемлекет басшысы ерекше мән беріп отырған маңызды іс», – деді әкім орынбасары.
Шағын бизнес өкілдері мен қала белсенділері де бастаманы қолдап, оның практикалық пайдасын атап өтті.
«Біз үшін Қосшы – жай ғана жұмыс орны емес, бұл – биыл алғашқы мерейтойын атап өтіп отырған ортақ үйіміз. Плоггинг – қаланы тез әрі тиімді түрде ретке келтірудің заманауи тәсілі. Әріптестер мен көршілердің осындай ынтасын көріп, қаламыздың болашағы зор екеніне көз жеткізесің», – деді акцияға қатысушылардың бірі, жергілікті кәсіпкер.
Алдағы уақытта қала билігі Қосшыны облыстағы ең таза әрі қарқынды дамып келе жатқан қалалардың бірі ретінде қалыптастыру мақсатында көгалдандыру және инфрақұрылымды жақсарту жұмыстарын жалғастыруды жоспарлап отыр.
Қосшыда экоплоггинг: «Таза Қазақстан» акциясы аясында тұрғындар аумақты тазартты
0 Comments91 Min Read 
