Қаржы саласы қызметкерлерімен жаңа Конституция аясында «Реформаның экономикалық аспектілері» тақырыбында мазмұнды кездесу өтті. Іс-шараның негізгі мақсаты – Конституциялық реформалардың ел экономикасының дамуына, қаржы саласының тиімділігіне және мемлекеттік басқарудың сапасын арттыруға қосатын үлесін кеңінен түсіндіру болды. Кездесу қаржы саласы мамандары үшін өзекті мәселелерді талқылайтын маңызды диалог алаңына айналды.
Кездесу барысында жаңа Конституция нормаларының елдің экономикалық тұрақтылығын нығайтуға, бюджеттік саясаттың ашықтығын арттыруға және мемлекеттік қаржы ресурстарын тиімді басқаруға бағытталғаны атап өтілді. Сонымен қатар мемлекеттік қаражаттың мақсатты жұмсалуы, қаржылық тәртіпті күшейту, сыбайлас жемқорлықтың алдын алу және мемлекеттік органдардың қоғам алдындағы жауапкершілігін арттыру мәселелері жан-жақты қарастырылды. Қатысушылар өздерін толғандырған сұрақтарын қойып, нақты әрі түсінікті жауаптар алды.
Спикерлер – аудандық мәслихат төрайымы Нұргүл Қуатова мен Қоғамдық кеңес мүшесі Миргүл Аяғанова экономикалық реформалардың табысты жүзеге асуы ең алдымен ашықтық пен есептілік қағидаттарына негізделуі тиіс екенін атап өтті. Олардың айтуынша, жаңа Конституция мемлекеттік басқарудың тиімділігін арттырып қана қоймай, бюджет қаражатын пайдаланудағы бақылауды күшейтіп, азаматтардың экономикалық процестерге қатысу мүмкіндігін кеңейтеді. Бұл өз кезегінде қоғамның мемлекетке деген сенімін нығайтуға ықпал етеді.
Кездесу ашық әрі еркін диалог форматында өтті. Қатысушылар өз пікірлерімен бөлісіп, қаржы саласындағы өзекті мәселелерді ортаға салды. Мамандар экономикалық реформалардың тәжірибеде жүзеге асырылуына қатысты ұсыныстарын айтып, өз ойларын білдірді. Осындай пікір алмасу қатысушылардың белсенділігін арттырып, кездесудің мазмұнын байыта түсті.
Іс-шара барысында жаңа Конституция нормаларын түсіндіру жұмыстарының маңыздылығы ерекше атап өтілді. Мұндай кездесулер мемлекеттік реформалардың мәнін халыққа жеткізуге, қоғам мен билік арасындағы өзара сенімді нығайтуға және елдің тұрақты экономикалық дамуына оң ықпал ететіні айтылды.
Кездесу соңында қатысушылар алдағы уақытта да осындай мазмұнды кездесулерді жалғастыру қажеттігін атап өтіп, жаңа Конституцияны қолдау елдің болашақ дамуы үшін маңызды қадам екенін жеткізді.
