Конституция – жай ғана құқықтық құжат емес. Ол – мемлекеттіліктің іргетасы, қоғам құндылықтарының көрінісі және ел дамуының стратегиялық бағдары. Сондықтан Қазақстан Республикасы Конституциясының жаңа жобасын талқылау ерекше маңызға ие.
Ұсынылып отырған өзгерістер саяси жүйені жетілдіруге, билік тармақтарының тепе-теңдігін нығайтуға, мемлекеттік органдардың қоғам алдындағы жауапкершілігін арттыруға, сондай-ақ азаматтардың ел басқару ісіне қатысу тетіктерін кеңейтуге бағытталған. Негізгі назар – адам құқықтары мен бостандықтарына, әлеуметтік әділдікке және тұрақты дамуға аударылып отыр.
Жаңа Конституция жобасы заң үстемдігін, ашықтық пен есептілікті күшейтуді көздейді. Бұл – қазіргі заман талаптарына және азаматтардың үміт-сеніміне сай тиімді мемлекеттік басқару үлгісін қалыптастыру жолындағы маңызды қадам.
Талқылау үдерісінің ашық түрде, қоғамдық институттар, сарапшылар және азаматтардың қатысуымен өтуі – құқықтық мәдениетті нығайтуға және белсенді азаматтық ұстанымды қалыптастыруға ықпал етеді.
Жаңа Конституция жобасын қолдау – бұл жаңғыру бағытын, мемлекеттілікті нығайтуды және Қазақстанның демократиялық, құқықтық мемлекет ретінде одан әрі дамуын қолдау.
Миргүл Аяғанова,
Біржан сал ауданының Аналар кеңесінің мүшесі.
